De Sport an uns’ Friedrich-Engels-Oberschaul

De meisten un  uk  de besten Indrück ut disse Tied sünd bi mi vom Sportunnerricht un denn’ Sport allgemein  an uns’ Oberschaul hingenbläben. Dat mööt man Käthen Peters un Walter Techen, uns’ beiden  Sportlihrers,  laten: Sei hemm’ bi uns so richtig de Leif tau’n Sport weckt !  Beid’ zeigten uns, wat  man in siene friee Tied all up de  Bein stelln künn. Dor würn Arbeitsgemeinschaften gründ’ un anleit’t, Schauturnen  organisiert un Vergliekskämpfe in Leichtathletik un Turnen mit anner Oberschaulen (tau’m Biespill mit Demmin, Niestrelitz un Stemhagen) dörchführt. Beid  sünd mit uns up Kreis-, Bezirks- un DDR-Meisterschaften  führt. Kort un gaut: Käthen Peters un Walter Techen gingen up in ehren Beruf.

Bi mi persönlich is jedenfalls soväl  hingenbläben, dat ick na ’t Abi ein Sportstudium upnahmen heff. Beid’ sünd  nu uk schon lang’ doot un  könn’  nich mihr seihn, wat ut ehr Jungs un Mäkens von damals worn is.

Walters Stunn’ begünn’ Grundsätzlich mit Gesang. Bi ’n Upmarsch  tau de Gymnastik hemm’ wi Sport-, Jugend- un Kampflieder sung’.   Ick mücht sengen, dat ick poor dorvon sogor hüt, na oewer dörtig Johren, noch in- un utwennig kann !